Рускиот министер за надворешни работи Сергеј Лавров денеска испрати предупредување до Соединетите Американски Држави, Јапонија и Јужна Кореја во врска со нивните обиди за формирање стратешки сојуз насочен против Северна Кореја – една од клучните сојузници на Русија во конфликтот со Украина, пренесува АП Њуз.

„Предупредуваме да не се злоупотребуваат вакви врски за создавање сојузи насочени против кого било, вклучително и против Северна Кореја и, секако, против Русија,“ изјави рускиот министер за надворешни работи Сергеј Лавров, според државната новинска агенција ТАСС.

Изјавите на Лавров дојдоа за време на неговата посета на Северна Кореја, каде се сретна со неговата колешка, Чое Сон Хуи.

Во последниот период, врските меѓу Русија и Северна Кореја се зајакнуваат – особено откако Северна Кореја почна да испраќа војници и муниција за руските операции во Украина, како дел од безбедносната спогодба склучена во јуни 2024 година.

Сега, Москва и Пјонгјанг на заеднички начин се обидуваат да спречат потенцијално странско влијание во Источна Азија, пишува АП Њуз.