САД, претседателот Бајден, државниот секретар Блинкен, се уверени дека Северна Македонија може и ќе ги направи неопходните чекори како што е продолжување на реформите, зајакнување на владеење на правото, борбата против корупцијата, зголемување на транспарентноста за да гарантира попросперитетна иднина за нејзините граѓани, како и зајакнување на стабилноста на регионот, истакна во неговиот говор помошник државниот секретар на САД за Европа и Евроазија и поранешен амбасадор на САД во Скопје, Филип Рикер, на конференцијата „Патот до Преспа“, на маргините на Преспа форумот за дијалог.

-САД остануваат посветени и се дел од овој регион и ќе продолжат да стојат покрај вас, како што кажа и самиот претседател Бајден како сојузник и како пријател. Тоа на сите нас ни потврди дека лидерите од Западен Балкан се дораснати на предизвикот – а тоа е дека размислувањето за иднината ги отвори вратите на НАТО и поради тоа САД, и јас лично, бев горд што соопштив дека Северна Македонија е членка на НАТО минатата година. Преспанскиот договор донесе конкретни предности и на Северна Македонија и на Грција, внесувајќи ја Северна Македонија во најголемата Алијанса, а исто така реафирмирајќи ја посветеноста на Грција кон Западен Балкан, продолжувајќи ја нашата заедничка цел – а тоа е да ја донесеме Северна Македонија поблизу до членство во ЕУ, рече Рикер.

САД, додаде тој, остануваат целосно посветени на Западен Балкан и оти нивната визија е Европа да биде комплетна, слободна, и во мир.

-Указот на претседателот на САД за санкции кон оние актери што сакаат да го поткопаат овој процес, ќе овозможи да се зајакне таа цел, приодонесувајќи кон ефикасна и стабилна власт, признавајќи дека целосната интеграција во трансатлантските институции е тоа што го сакаме и го очекуваме, порача Рикер, и подвлече дека Преспа овозможи да се подобри соработката во енергетиката, одбраната, и трговијата меѓу Северна Македонија и Грција.