Католичката црква во Албанија преку соопштение до медиумите изрази загриженост за резултатите од пописот „Censit2023“ и ефектите што намалувањето на бројот на населението ќе ги има врз заедницата.

Според резултатите од пописот, бројот на католички верници во Албанија во споредба со пописот на населението спроведен во 2011 година, е намален од 10% на 8,4%. Католичката црква нагласува дека намалувањето на бројот на верниците е феномен за кој се свесни, бидејќи е поврзан со масовното иселување главно од северните области на земјата.

„Што се однесува до бројот на католиците, можеме да кажеме дека ги немаме при рака елементите за да судиме дали всушност ова е бројот на католиците во Албанија. Општото намалување на населението доведе и до намалување на католиците и нивно бегство во западните земји, главно во Европа и Северна Америка. Во овие години ние како католичка заедница немаме направено попис на населението. Затоа, и ние имаме обврска да го спроведеме овој Попис во нашите епархии и парохии за да го знаеме, иако грубо, но реално, бројот на католиците на територијата“, изјави портпаролот на Католичката бискупија на Албанија, Дон Марк Пашќа.

Но, и Католичката црква нагласува дека бројот на оние кои ја напуштиле Албанија во текот на последните 13 години е поголем од бројката од 410.000 пресметана од ИНСТАТ.

„Сметаме дека бројката е поголема од тоа. Тоа е феномен кој ние како Католичка црква одвреме-навреме сме го почувствувале и изразувале поради нашето присуство на територијата на Албанија. Сведоци сме на масовно заминување на албанските семејства надвор од Албанија и оваа рана ја доживуваме секојдневно. Ова е поврзано со втората загриженост што ја покажува статистиката: намалувањето на младите и работоспособната возраст. Тоа носи последици во развојот на општеството и особено во духовната и економската благосостојба на албанските семејства. Оваа контракција го намалува бројот на бракови и нови семејства кои се гаранција за раѓање и образование на децата, како основни должности на бракот и семејството и кои гарантираат континуитет не само бројчано, туку и квалитативно на општеството. Заминувањето на младите трајно ја осиромашува Албанија“, вели Пашќа.