Републиканците во идното свикување на Претставничкиот дом на американскиот Конгрес ќе имаат тесно мнозинство од 220 пратеници наспроти 215 демократи, откако демократите добија едно пратеничко место во Калифорнија, покажуваат најновите податоци на Истражувачката агенција Едисон, пренесува Ројтерс. 

Новоизбраниот американски претседател Доналд Трамп и републиканците ќе ја контролираат Белата куќа и двата дома на Конгресот почнувајќи од следниот месец по ноемвриските избори на кои демократите ги загубија и Белата куќа и Сенатот, објави Ројтерс.

Теткото мнозинство во Домот што сега го имаат републиканците дополнително ќе се намали на 217-215 во јануари, откако Трамп избра двајца републикански пратеници за главните позиции во неговата администрација, Мајк Волц и Мет Гец, и покрај тоа што вториот подоцна се повлече.

Демократот Адам Греј освои место во Претставничкиот дом како претставник на Калифорнија, што е најнов резултат од изборната трка за Домот на Конгресот на 5 ноември.

Републиканците оваа недела го истакнаа својот план веднаш да започнат со спроведување на агендата на Трамп – штом ќе ја преземат функцијата.

За време на кампањата, Доналд Трамп истакна голем број приоритети, вклучително и нови тарифи, масовни депортации на мигранти без документи, дерегулација на енергетскиот сектор и продолжување на даночните намалувања воведени за време на неговиот прв мандат.