Ректорот на „Св. Кирил и Методиј” проф. д-р Билјана Ангелова и проф. д-р Огнен Марина, декан на Архитектонски факултет-Скопје и раководител на Центарот за напредни и постдокторски истражувања – ЦАПРИС УКИМ учествуваат на 8-от Ректорски форум на Југоисточна Европа и Западен Балкан, што се одржува во Ректоратот на Универзитетот во Сараево од 30 до 31 мај 2024 година. Форумот ги обединува универзитетите од регионот и има за цел да ја подобри и прошири соработката помеѓу универзитетите во овој дел на Европа.

На првиот ден од Ректорскиот форум беше организира трибина за иднината на универзитетот проф. д-р. Билјана Ангелова, ректор на Универзитетот „Св. Кирил и Методиј” во Скопје имаше свое обраќање на панел дискусијата за иднината на универзитетите во Европа. Таа нагласи дека „подготвеноста и капацитетот на луѓето за промени покрај дигитализацијата и соочувањето со демографските предизвици се главниот предуслов за подобра иднина на нашите универзитети”.

Првиот ден од форумот беше искористен и за потпишување на Договорот за формирање на регионална мрежа на центри за напредни студии во Југоисточна Европа (RECAS – Регионална мрежа на центри за напредни студии во Југоисточна Европа ) со цел да се подобри соработката во научни, академски и професионални области од заеднички интерес за сите вклучени универзитети.

Вториот ден од Ректорскиот форум ќе биде посветен на четвртата работилница за ЕУТОПИЈА проектот за Западен Балкан, чија цел е финансирање на истражувачки активности на меѓународно, државно и институционално ниво.

Основан во 2018 година, Ректорскиот форум на Југоисточна Европа и Западен Балкан обединува 31 универзитет од регионот. Ректорскиот форум на Југоисточна Европа и Западен Балкан е посветен на подобрување на соработката меѓу универзитетите и зајакнување на гласот на академските институции во овој дел на Европа, решавање на клучни прашања, промовирање на европската политика во високото образование и истражување во регионот, размена на добри практики, подготовка на заеднички проекти, усогласување на законодавството, поттикнување размена на кадри и студенти итн. Тоа е една од иницијативите што произлегоа од Берлинскиот процес, идеи за подобра интеграција на Југоисточна Европа. Неговата цел е да ги промовира европските политики во науката и високото образование, размената на добри практики и зајакнувањето на соработката на заеднички проекти.

Со Ректорскиот форум на Југоисточна Европа и Западен Балкан претседава ректорот на Универзитетот во Риека, проф. д-р. Сњежана Пријиќ-Самарџија.