Во Германија минатата година од оптек се повлечени поголем број лажни евро банкноти отколку во 2022 година, објави германската централна банка (Бундесбанк) во Франкфурт на Мајна.

„Бројот на фалсификувани банкноти повлечени од оптек во 2023 година се зголеми за 28,2 отсто во споредба со 2022 година и изнесуваше 56.000“, се вели во соопштението на германската централна банка.

Вкупната штета предизвикана од употреба на лажни банкноти изнесува 5,1 милион евра. Во исто време најголема штета е направена на банкнотите од 200 и 500 евра преку трговијата со накит, златни шипки, часовници и автомобили.

Банкнотата од 50 евра и натаму е најпопуларна меѓу шверцерите. Дури 38 отсто од сите запленети фалсификувани банкноти се банкноти од 50 евра. После тоа доаѓаат банкнотите од 20 евра.

Меѓу најчесто фалсификуваните монети се и монетите од две евра.

И покрај зголемувањето на бројот на запленети банкноти, фалсификувањето се уште е на ниско ниво, објави Бундесбанката.

„Вкупниот износ на шверцувани пари сè уште е, генерално, на ниско ниво, што значи ниско ниво на опасност за граѓаните“, рече Буркхард Балц, комесар на централната банка за фалсификувани пари.

Според податоците на Европската централна банка (ESB), во 2023 година биле откриени 467.000 фалсификувани банкноти на евра, што е за 24 отсто повеќе од 2022 година.