Мнозинството по речиси две недели расправа ги разреши тројцата министри од Алтернатива. За разрешувањето на Беким Сали од министер за здравство гласаа 65 пратеници, без ниту еден против и воздржан, министерите за информатичко општество и администрација Адмирим Алити и министерот без ресор задолжен за дијаспората Џемаил Чупи се разрешени со 64 гласа од мнозинството и со по еден против.

Опозициската ВМРО-ДПМНЕ иако беше присутна во салата не гласаше за разрешување на министрите од Алтернатива. Во салата не беа присутни пратениците од „огнената група“ од ДУИ изет Меџити, Кастриот Реџепи и Мерита Коџаџику.

По разрешувањето на министрите од Алтернатива, претседателот на Собранието ја продолжи седницата за избор на новите министри.

Бидејќи Џафери најави општа расправа за именување на новите министри,а поединечно гласање за секој од нив, координаторот на пратеничката група на ВМРО-ДПМНЕ Никола Мицевски процедурално забележа дека не може за разрешувањето на министрите да се води одделна расправа, а сега за избор на новите министри да се расправа за сите оддеднаш.

Расправата за избор на нови министри ќе продолжи вечер, по седницата за пратенички прашања. Предлози за нови министри се: Кренар Лога за правда, Фатмир Меџити за здравство, Азир Алиу за информатичко општество и администрација и Каја Шукова за министер за животна средина.

На почетокот на седницата, пред 10 дена, беа констатирани оставките на министерот за правда Никола Тупанчевски и на министерот за животна средина Насер Нуредини.