Србија годинава најмногу ја посетуваа туристи од Русија, кои се повеќе се свртуваат кон српските бањи и планинските центри. Туристите од Турција се втори по бројот на ноќевања во Србија, а потоа следат туристите од Босна и Херцеговина, Германија, Романија и Кина.

Аранжманите за новогодишната ноќ се претежно распродадени, а слободни места има и за зимскиот распуст, а цените на сместувањето се за околу 10 отсто повисоки од ланските, изјави за РТС директорката на Туристичката организација на Србија (ТОС) Марија Лабовиќ.

Таа очекува дека 2023 година ќе биде нова рекордна година за српскиот туризам, со оглед на тоа што во првите девет месеци е забележан пораст на бројот на пристигнувања и ноќевања туристи во однос на минатата година, која беше рекордна.

„За првите девет месеци имавме над 3,2 милиони пристигнувања туристи, од кои странските туристи учествуваа со над 50 отсто од учеството и со раст од цели 24 отсто, а кога станува збор за ноќевањата, реализиравме над 9,7 милиони ноќевања за првите девет месеци. Ова е зголемување од девет проценти во однос на истиот период лани“, изјави Лабовиќ за РТС.

Белград и Нови Сад се омилени дестинации за странските туристи, додека домашните туристи претпочитаат да одат на Златибор, Копаоник, Дивчибаре, Сокобања и Врњачка Бања. Кога станува збор за новогодишната ноќ, според информациите што ТОС ги има од терен, аранжманите се во голема мера распродадени, особено во бањите, но и во планинските центри.