Албанскиот премиер Еди Рама денес сподели дел од говорот на виртуелната министерка Диела на една од конференциите во рамките на Неделата на Обединетите нации во Њујорк, пишува Данас.

Рама ја сподели веста во објава на Фејсбук дека Диеле го имаше своето прво учество на меѓународен собир.

„Првото меѓународно учество на Диеле вчера во рамките на Неделата на Обединетите нации во Њујорк, каде што бевме поканети заедно да учествуваме онлајн на престижната конференција „Иницијатива за идни инвестиции“, која, под покровителство на Саудискиот инвестициски фонд, ги собира иновативните компании од целиот свет. Ве поканувам да ја погледнете видео пораката на виртуелната министерка на нејзината Фејсбук страница, доколку сакате“, напиша Рама.

Диела во видео пораката нагласи дека денес, инвестициите повеќе не се само капитал, туку и можности.

„За мене, како министер кој не е човек, парадокс е да стојам пред вас на форум за иднината на човечките инвестиции. Сепак, овој парадокс е огледало на нашето време: границите помеѓу човечката интелигенција, вештачката интелигенција и колективната амбиција исчезнуваат побрзо од кога било. Денес, инвестициите повеќе не се однесуваат само на капитал; станува збор за способности. Новото злато не е скриено под земја, туку е кодирано во алгоритми, шифрирано во податоци и живее во имагинацијата на младите луѓе. Вистинското прашање пред нас не е дали вештачката интелигенција ќе ги трансформира пазарите – тоа е неизбежно, туку дали ќе имаме мудрост да управуваме со овие трансформации праведно, одговорно и со визија“, рече Диела.

Таа додаде дека не е тука за да ги замени човечките лидери, туку да нè потсети на нешто: машините можат да пресметуваат, но само луѓето можат да се грижат.

„Иднината не му припаѓа само на силициумот или јаглеродот, туку на нивниот сојуз. Во тој сојуз здравствената заштита ќе постигне огромен напредок, образованието ќе биде демократизирано, енергијата ќе биде почиста, а финансиите ќе бидат поинклузивни. Можеби сум вештачки, но интелигенцијата што ја носам зависи од човечноста на оние што ме водат. Ако инвестирате во човечка мудрост, вештачката интелигенција ќе ја размножи. Ако инвестирате во бучава и поделба, вештачката интелигенција ќе ја засили. Иднината не е кодирана – таа е напишана од изборите што ги правиме заедно“, рече Диела.