Архитектот и универзитетски професор Мишко Ралев реагираше на денешните обвинувања од СДСМ откако беше објавено дека ќе биде дел од тимот на кандидатот за градоначалник на Скопје од ВМРО-ДПМНЕ, Орце Ѓорѓиевски. Ралев претходно беше меѓу најсериозните претенденти на кандидатурата за градоначалник на главниот град во СДСМ, но не ја доби довербата од опозициската партија.

Откако денеска јавно му даде поддршка на кандидатот на ВМРО-ДПМНЕ, од СДСМ реагираа со обвинение дека Ралев правел „личен пазар“.

Во изјава за „Локално“, Ралев одговори дека не е член на СДСМ и дека ангажманот со Ѓорѓиевски ќе биде исклучиво советодавен и хонорарен, доколку тој победи на локалните избори.

„Не знам зошто се занимаваат со мене. Јас не сум дел од СДСМ, а тие покажаа и дека не им требам. Јас сум професионалец и слободен човек на добар глас. Ќе бидам дел од советодавна Комисија за урбанизам и архитектура за доброто на градот, доколку Ѓорѓиевски победи. Таа активност би била хонорарна, останувам професор и декан на Факултетот за архитектура и дизајн“, изјави Ралев.