Ракометарките на Ѓорче Петров без поголеми проблеми се пласираа во финалето на Купот на Македонија, совладувајќи го тимот на Вардар со убедливи 39-18 во полуфиналниот натпревар одигран во салата „25 Мај“ во Радовиш.

Од самиот почеток беше јасно кој ќе го води темпото на игра, избраничките на Ѓорче Петров од првата минута го презедоа водството и првото полувреме го завршија со предност од 19-12. Во вториот дел, Вардар влезе во серија грешки, што тимот од Ѓорче Петров знаеше вешто да го искористи и рутински да ја зголемува предноста до конечните +21.

Најефикасна во победничкиот состав беше Ана Марија Коларовска со шест голови, додека во редовите на Вардар се истакна Леона Миленовска, исто така со шест погодоци.

Во борбата за трофејот, Ѓорче Петров ќе се сретне со победникот од второто полуфинале во кое силите ќе ги одмерат Металург и Чаир.