Десетици работници беа извлечени живи од метални контејнери откако беа затрупани од лавина на Хималаите во индиската држава Утараханд.

Некои преживеаја речиси два дена бидејќи контејнерите имаа доволно кислород за да ги одржат додека спасувачите не ги лоцираат, објавија индиските медиуми, повикувајќи се на локалните власти.

Преживеаните беа префрлени во болниците во државата, јавува Би-Би-Си.

Во петокот 54 работници беа затрупани кога лавина покри градилиште кај селото Мана. Осуммина загинаа, а останатите 46 беа спасени.

Спасен работник рекол дека повеќето луѓе спиеле кога удрила лавина.

Операцијата траеше речиси 60 часа на температури под нулата и беше завршена во неделата.

Лавините и одроните се вообичаени во повисоките региони на Хималаите, особено во зима. Експертите велат дека климатските промени ги направиле екстремните временски настани посериозни и помалку предвидливи.