По само три одиграни кола во новата сезона од Првата македонска фудбалска лига (ПМФЛ), тимот на Работнички остана без шеф на стручниот штаб. Од клубот од Дебар Маало денеска официјално соопштија дека тренерот Бојан Марковски повеќе нема да ја предводи екипата.

Одлуката доаѓа по слабата серија на почетокот од сезоната, реми без голови против Тиквеш и два порази од Башкими и Струга, двата со резултат 2:0. Дополнителна причина за загриженост беше фактот дека Работнички е единствениот тим кој по три кола сè уште нема постигнато погодок.

Интересно, веста за разделбата со Марковски доаѓа непосредно по убедливата победа од 16:0 против Карбинци во рамки на Купот на Македонија. За Марковски, ангажманот во Работнички беше и прв во кариерата како главен тренер, претходно како помошник работеше во АЕЛ Лимасол и Етникос.