Скијачкиот центар Попова Шапка е без поголемиот број од вработени. Над 25 работници протестираат пред седиштетото на центарот оти како што велат раководството бара од нив да потпишат отказ од „Елем Турс“ и да преминат во новоформираното претпријатие Ски центар Попова шапка ДООЕЛ Тетово.

Шабан Османи кој речиси целиот работен век го поминал на центарот, вели дека тој и неговите колеги не се согласуваат на ваквиот чекор оти во старото претпријатие имаат решенија на неопределено, а за во новото им нудат договори на три месеци.

„Тие формирале една нова фирма отвориле конкурс и бараат од нас да ги депонираме решенијата од старата фирма. Тие ни велат дека три месеци ќе бидеме на договор на дело, тоа е да не исфрлат на пат. Ние бараме да се реши проблемот. Јас со моите колеги доаѓаме тука секој ден и како што не гледате седиме цел ден и никој не ни кажува ништо. Фирмата не е нивна за да одлучуваат како што сакаат. Сме имале плата, но отсега натаму не знаеме, ние сме вработени во Елем Турс, сега е само променето името и ни велат таму да се префрлиме во новата фирма. Низ годините името на фирмата се менувало повеќе пати, но немало проблеми, сега бараме тоа да се реши на ист начин, а не на три месеци да бидеме осигурани“, вели Шабан Османи вработен во Елем Турс.

За Елем турс почната е постапка за ликвидација. Вработените кои денес протестираа бараат поконкренто објаснување што ќе се случува со нив. Како што велат добиле штуро објаснување дека фирмата работела нерантабилно.

„Ни истакнаа дека се затвора старата фирма поради нерентабилност, тоа не е наш проблем. Ни рекоа вие ќе конкурирате во нова фирма со иста дејност, само што нема да имате решение на определено туку на неопределено време. Со тоа никој не се сложува. Тие ја отворија фирмата се вработија 6 луѓе, а другите седиме тука. Нека ни објаснат, дали сме без работа, не сме без работа, се затвора или не се затвора. Сакаме да се реши нашиот проблем или преземење или оштета, нешто да се реши. Ние не бараме работа ние сме вработени, ако бараме работа треба да имаме отказ, значи треба нешто да се случи. Уште фигурираме во Елем Турс“, вели Зоран Јовановски вработен во Елем Турс.

Адем Авзиу управителот на новата фирма Ски центар Попова Шапка ДООЕЛ Тетово, вели дека конкурсот за новата фирма може повторно да се објави, а вработените ако се одлучат да конкурираат после Нова година ќе бидат пријавени на неопределно време откако ќе им заврши тримесечниот договор, така му било посочено од АД ЕСМ, под чија капа се наоѓа скијачкиот центар.

„Целта беше да се отвори патот на стратешкиот инвеститор за Попова Шапка, за да добие чиста фирма која нема да биде поврзана со другите подружници, затоа треба да се ликвидира „Елем Турс“ и ја отворивме новата фирма Ски центар Попова Шапка каде треба да бидат истите вработени од Елем турс. Одлуката на Управниот одбор на АД ЕСМ беше да се отвори оглас на определено време и пред Нова година ќе има друг оглас на неопределено, така е одлучено. Сега тие не веруваат во тоа, вработените одлучиле да протестираа и тие не конкурирале, дел од вработените аплицираа, но другите не аплицираа. За „АД Елем Турс“ ќе се води постапка за ликвидација. Тие работни места кај што не конкурале се празни и ние пак може да го реобјавиме конкурсот, може пак да се пријават вработените“, вели управителот на Ски центарот Попова Шапка ДООЕЛ Тетово Адем Авзиу.

Вработените велат дека и понатаму ќе протестираат пред седиштето на ски цетнарот, се додека не ми се даде подетално објаснување, но и вработување на неопределено време.