Кртови во Министерството за внатрешни работи (МВР) има и наша работа е да ги решиме, вели во своите јавни настапи министерот за внатрешни работи Панче Тошковски. Тој и од собраниска говорница, но и во телевизиските интервјуа постојано повторува дека кртовите во МВР преку одредени поранешни високо позиционирани политички функционери од минатото одаваат информации и го оневозможуваат дејствувањето во одредени полициски акции што ги спроведува МВР.

Иако се споменуваа кртови во МВР и за двете акции на МВР и за кланот „Беланоца/Барон“ и за апсењето на групата на Раде Трајковски Штекли, сепак, во двете постапки засега официјално не се споменува полициски службеник.

Во последната полициска акција што ја спроведоа МВР и Обвинителството за гонење организиран криминал и корупција, беа уапсени Штекли и уште девет други лица за трговија со дрога. Штекли е осомничен дека бил организатор на криминалната група и преку нејзините припадници вршел дистрибуција и улична продажба на наркотична дрога директно на корисниците.

Дел од медиумите јавија дека на поранешен полициски началник му бил одземен телефонот, под сомнение дека соработувал со групата на Штекли. Но, засега ниту во соопштението на Министерството ниту во соопштението на Обвинителството, меѓу осомничените нема полициски службеник.

– При реализацијата, постапувајќи по наредби за претреси во дом и други простории издадени од судија на претходна постапка, извршени се претреси кај 16 лица, на вкупно 21 локациja на подрачјето на Скопје и Гевгелија. При претресите се пронајдени и се одземени поголем број предмети за кои ќе биде извршено форензичко вештачење. Меѓу пронајдените и одземени предмети се и повеќе поголеми и помали пакувања со прашкаста материја. Во текот на денешниот ден ќе биде поднесена кривична пријава против 14 лица до надлежното Јавно обвинителство, а тие ќе бидат изведени пред судија на претходна постапка – соопшти првично МВР.

Обвинителството не може да сподели детали

Потоа Обвинителството дополни дека надлежниот обвинител издал наредба за спроведување истражна постапка против 14 лица под сомнение дека сториле кривично дело „неовластено производство и пуштање во промет на наркотични дроги“. Во Истражниот затвор Шутка заврши Штекли и уште девет други лица, три лица се во бегство, а еден од 14-те веќе бил во притвор.

„Слободен печат“ испрати прашања и до МВР и до Обвинителството дали во рамките на истрагата има осомничен полициски службеник, но детали за тоа нема, ниту дали Штекли го поврзале со групата „Барон/Беланоца“.

– Со оглед дека сè уште се преземаат дејства во врска со вашите прашања, во моментов не сме во можност да споделиме детали како не би ја нарушиле постапката – велат од Обвинителството.

По акцијата против групата „Беланоца/Барон“ беше приведено едно лице, син на поранешен заменик-министер за внатрешни работи од ДУИ, но откако му беше одземен мобилниот телефон, тој беше ослободен. Тој се споменуваше дека ја пробил акцијата и дека еден од припадниците на групата „Барон/Беланоца“ избегал неколку минути пред да му биде извршен претрес во домот.

– Акцијата е пробиена во завршна фаза, односно ден-два пред да се преземе официјално акцијата. Токму и на таа околност Јавното обвинителство и сега истражува да дознае „кој е кртот“ на пробивање на акцијата. Меѓутоа, ете, успеа два дена пред планираното да спроведе акција и дел од осомничените да ги уапси – рече јавниот обвинител, Љупчо Коцевски.

Истрагите треба да покажат дали и кој ги пробил акциите и дали некој бил во дослух со криминалните групи.

Богатото досие на Штекли

Штекли трипати беше мета на напад, но преживеа. Кога се случи првиот напад во „Ист гејт“, Штекли веднаш беше поврзан со истрагата за убиството на младиот фудбалер Мартин Јанушев, кое се случи во 2017 година кај „Ред кафе“ во скопската населба Аеродром.

Како што објавуваа медиумите непосредно по убиството, Јанушев бил повикан од осомничениот за убиството, Филип Секуловски Кобра, и добил порака – „дојди да се пресметаме“.
Мартин го зел пиштолот на татко му, вработен во МВР, и излегол од зградата, но Секуловски бил побрз од него и испукал пет куршуми. Кобра, всушност, кога се случи убиството, бил излезен од затворот на викенд, каде што издржувал казна за трговија со дрога.

Она што го поврзуваше Штекли со убиството беше тоа што Кобра, наводно, пред убиството се сретнал токму со Штекли, кој токму на тој ден објавил фотографија од Белград, каде што бил за време на убиството. Секуловски беше уапсен и осуден по две години минати во бегство, а Штекли никогаш не беше обвинет и не беше докажана неговата поврзаност со ова убиство.

Во септември 2021 година, Штекли беше уапсен во Белград. Тој беше баран со меѓународна потерница, но не за убиството на Јанушев, туку за напад за кој бил осуден на шест месеци затвор. Иако Штекли во Белград беше уапсен во 2021 година, во Македонија беше екстрадиран во февруари 2022 година и беше пренесен во Истражниот затвор во Шутка.

Освен од Белград, Штекли беше екстрадиран и од Атина во 2011 година, но не во Македонија, туку во Италија. Нападите врз Штекли почнаа по двојното убиство во „Шиша бар“ под скопско Кале, кога беа убиени двајца водачи на „Дуќанџик“. Штекли се поврзуваше со спротивставената група „Беланоца/Барон“, која од „Идризово“ ја водеше Фатљум Ајети-Тоте.