Денеска во Битола се одржа промотивна кампања за бесплатна правна помош. Целта на промотивната кампања е да се зајакне свеста кај граѓаните за постоењето бесплатна правна помош, истакна Ирена Цуцулоска-Јакимовска, раководителка на проектот за бесплатна правна помош во канцеларијата на Совет на Европа во Скопје.

-Граѓаните ги информираме за тоа каде да се обратат за бесплатна правна помош и на тој начин да го зголемиме бројот на информирани граѓани, затоа што свесноста сè уште е на ниско ниво. Информираноста е клучниот инструмент за функционирање на системот за бесплатна правна помош и затоа потребни се повеќе вакви настани, посочи Цуцулоска-Јакимовска.

Таа додаде дека на кампањата и претходеше истражување меѓу граѓаните за тоа дали се запознаени со Законот за бесплатна правна помош кој беше донесен во 2019 година.

Проектот за бесплатна правна помош се имплементира во соработка со Министерството за правда и овластени здруженија на граѓани за бесплатна правна помош.

Во рамки на проектот во општините Новаци и Могила отворени се канцеларии за бесплатна правна помош.