„Српска железничка инфраструктура“, релативно млада компанија основана во 2015 година како една од четирите компании во составот на „Железници Србија“, често беше во очите на јавноста, не само поради големите инфраструктурни проекти, туку и поради апсењето на нејзините директори. Речиси сите директори на оваа компанија биле или уапсени за злоупотреба на службената положба, корупција и примање мито или осомничени за одредени афери. Последниот случај на апсење на в.д. директорката на оваа компанија, Јелена Танасковиќ, се поврзува со лошото извршување на работите на реконструкција на Железничката станица во Нови Сад, анализира Данас. Заедно со Јелена Танасковиќ уапсен е и претходниот директор на оваа фирма, Небојша Шурлан.

Шурлан беше избран за шеф на „Железничката инфраструктура на Србија“ наместо Мирољуб Јевтиќ, кој беше уапсен на 11 јануари под сомнение за примање мито, а неколку дена подоцна беше разрешен. Пред Јевтиќ, директор на оваа компанија една година беше Душан Гарибовиќ, до неодамна директор на „Србија Карго“, кој на таа функција помина седум години. Прв директор на „Инфраструктура желенице“, именуван во 2015 година, беше Горан Макшиќ, кој беше разрешен веќе во 2016 година бидејќи, како што пишуваа тогаш медиумите, распишал тендер за санација на свлечиште на пругата Барска кај Косјериќ, а потоа по забрзана постапка, ја доделил работата на компанија чија понуда била за милион и пол динари повисока од понудата на друг учесник на тендерот, иако критериум била економски најповолната цена.