Минатиот месец, научното списание „Нејчр“ („Nature“) објави нов научен труд од областа на Климатологија, од група автори, предводени од проф. д-р Серџо Висенте Серано од Универзитетот во Сарагоса, каде што коавтор е и д-р Иван Радевски, редовен професор на Институтот за географија при Природно-математичкиот факултет во Скопје.

Трудот ги оспорува претходните проекции за генерален тренд на намалување на врнежите во Медитеранот, анализирани на три континенти и покажува дека количеството на врнежи во голема мера останало стабилно од 1871 до 2020 година.

Иако постојат мултидецениски и меѓугодишни варијации, трендовите главно се поврзани со атмосферската динамика, а не со долгорочно намалување, што влијае на климатските политики и планирањето на ресурсите. Овој заклучок се заснова на најсеопфатниот достапен податочен сет за регионот, кој опфаќа над 23.000 метеоролошки станици во 27 земји. Иако за одредени периоди и подрегиони може да се идентификуваат трендови, нашите наоди ги припишуваат овие трендови главно на атмосферската динамика.

Со оваа публикација, Институтот за географија преку научната актива на професор Радевски има три коавторства во најпрестижните списанија во светот од кои во две во „Nature“ (импакт фактор 50,5) и едно во „Science“ (импакт фактор 44,7).

Ваквите публикации имаат значително поголемо влијание во рангирањето на универзитетите од останатите трудови со фактор на влијание, како и за афирмацијата на Институтот за географија и Природно математичкиот факултет во Скопје.

Освен овие публикации, во 2023 година проф. Радевски објави научен труд и во струковното престижно списание за науки за земјата Nature Geoscience (IF=15,7).