По вчерашната скандалозна изјава на професорот на Универзитетот во Синсинати САД, Иван Динев Иванов, во гостување на „Канал 5“, денеска остро реагираше Еврејската заедница во Македонија, од каде со индигнација ги отфрлаат тврдењата на Динев Иванов дека Музејот на холокаустот се користи за пропаганда.

Професорот, кој има американско и бугарско државјанство, изјави дека фотографиите изложени во Музејот на холокаустот во Скопје, на кои се гледа депортацијата на Евреите од Македонија од страна на бугарскиот окупатор за време на Втората светска војна – биле монтирани.

„Еврејската зедница и Фондот на холокаустот на Евреите од Македонија со индигнација ги отфрлаат инсинуациите и лажните тврдења дека во постојаната поставка во Меморијалниот центар на холокаустот на Евреите од Македонија се користат монитирани фотографии, документи и филмови, и дека Меморијалниот центар на холокаустот е место од каде се врши искривена пропаганда, за улогата на Бугарија во депортацијата на Евреите од Македонија“, се вели во реакцијата.

„Меморијалниот центар на холокаустот на Евреите од Македонија го чува споменот и е посветен на 7.144 Евреи од Македонија кои беа брутално прогонувани, понижувани, етикетирани, ограбени и депортирани во смрт од страна на тогашните бугарски фашистички власти. Би сакале да напоменеме дека во креирање и изградба на постојаната изложбена поставка во Меморијалниот центар учествуваа реномирани светски историчари од ерата на холокаустот кои своите истражувања, преземање и откуп на архивски материјал ги правеа во архивите на Меморијалниот музеј на холокаустот во Вашингтон, САД, Јад Вашем во Израел и други архиви“, велат од Еврејската заедница.

„Обидите на проф. д-р Иванов за искривување на историската вистина и улогата на Царска Бугарија во холокаустот на Евреите од Македонија се скандалозни, пред се за еден професор кој треба на своите студенти да им ја пренесе вистината за историските настани, а не да се става на страната на официјалното искривување на историската вистина за холокаустот од одредени бугарските политичари и историчари, кои се одвиваат во континуитет. Ние, Евреите од Македонија, нема да дозволиме никакво искривување на историјата во дневно политички цели. Нема да дозволиме да се заборави каде и како завршија 7.144 Евреи од Македонија, само затоа што се поинакви по вера и традиција од ариевската раса, само затоа што некој сака да ја стави под килим својата негативна историска улога. Фактот дека Бугарија беше соучесник во едно од најголемите злосторства во историјата на човештвото не може да се избрише, па тоа да е и обидот на проф. Иван Динев Иванов“, се додава во реакцијата.