
Продолжува битката за помалите партии
Откако ВМРО-ДПМНЕ се пофали дека преговара со дел од помалите партии од Коалицијата предводена од СДСМ, денеска партискиот лидер Зоран Заев му порача на Христијан Мицкоски да си ја реформира партијата.
Препорачано
– ВМРО-ДПМНЕ треба да се реформира во однос на градењето на политики, ставови и стратегии, зошто во спротивно уште долго ќе остане во опозиција – рече Заев од Виница.
Вчера потпретседателот на ВМРО-ДПМНЕ Александар Николовски рече дека разговараат со помали политички партии, дури и со партии од владејачката коалиција.
– Ќе кажам две работи, политичките партии кои се дел од коалицијата „Обнова на Македонија“ остануваат, но има интерес да ни се приклучат и други политички партии. Тие не се во сојуз ни со ВМРО-ДПМНЕ ни со СДСМ, а дел пак се политички партии кои се во сојуз со СДСМ – рече Николовски.
Од СДСМ возвратија дека предводат Коалиција од 30 партии и имаат намера уште да ја зголемуваат.
„Се спроведуваат мерки во интерес на граѓаните и сето тоа отвора можности оваа коалиција дополнително да се зголеми со нови партнери. Она што досега го спроведовме наиде на широка поддршка и од други политички субјекти, така што веруваме дека коалицијата може да се прошири дополнително и да создадеме најголема коалиција од независноста до денес“, рекоа од СДСМ.