Откако струшкиот градоначалник Рамиз Мерко и министерот за животна средина, Насер Нуредини денеска не се појавија на судското рочиште за струшката дива депонија, случајот излезе од судница и се префрли на самото место каде настана оваа потенцијална закана за граѓаните на Струга и туристите, објави Алсат.

Судскиот процес го покрена невладинaта организациja „Македонско здружение на млади правници“ против локалната и централната власт за непостапување при решавањето на овој еколошки проблем.

Според адвокатот Глигорие Ќатоски и граѓански активист дивата депонија мора да се дислоцира и да се санира штетата.

-Ова чудовиште кое се наоѓа во непосредна близина на градот Струга треба да биде дислоцирано. Поентата на денешното судско рочиште на лице место е да го увериме и судот и јавноста и странките во постапката прво во големината на оваа депонија и потенцијалната идна штета која може да произлезе“, рече Ќатоски.

Иако дивата депонијата се наоѓа на плодното струшко поле и во непосредна близина на посеви кои потоа се пласираат на пазарите, Општина Струга, не гледа опасност од неа.

„Не е еколошка бомба. Не знам зошто мислите дека оваа дива депонија е поразлична од било која друга депонија. Инаку, дислоцирање на оваа депонија беше во рамките на програмата на градоначалникот во изборите. Тој тоа го прифати и во своите активности заедно со Република Македонија да го реши тој проблем. Поединечно немаме услови и не можеме законски да постапиме поинаку“, рече Драган Коровешоски кој е адвокат на општина Струга.

Мега депонијата зафаќа површина колку 4 фудбалски игралишта, тврдат граѓанските здруженија и  претставува опасност, не само за езерото и граѓаните, туку и за целиот еко систем во околината со оглед на тоа што таму се депонираат 40.000 тони смет годишно.

На само петсто метри од дивата струшка депонија се првите куќи, како и реката Црн Дрим. Иако им вети на граѓаните, градоначалникот Мерко не вложи напори да ја дислоцира.