Претседателот на Здружението на приватни стоматолози Жарко Георгиевски информира дека го контактирале од Кабинетот на вицепремиерот за економски прашања, Фатмир Битиќи, при што го повикале на средба која очекува да се случи во текот на неделава. Веста ја потврдија и од кабинетот на Битиќи.

-Приватните стоматолози ги исконтактиравме да видиме кои се нивните барања и со кои проблеми се соочуваат. Всушност тоа го правиме со сите кои имаат побарано да се сретнат со претставници од Владата. Барањата се разгледуваат од страна на економските тимови на Владата, и во моментов не може со сигурност да се каже дали ќе бидат прифатени, односно дали стоматолозите ќе бидат опфатени во петтиот пакет мерки. Што се однесува до промената на парафискалните давачки, станува збор за системски решенија на кои веќе работиме, велат оттаму и додаваат дека е отворен повик од Фондот за иновации во вредност на шест милиони евра на кои можат да аплицираат и стоматолозите.

Приватните стоматолози бараат директна финансиска помош за исплата на минимални бруто плати на вработените во стоматолошките ординации како и ослободување од фискални трошоци се додека трае ковид- кризата.

Д-р Дафина Богеска од Здружението на приватни стоматолози и доктори по дентална медицина во изјава за „Слободен печат“ вели дека капитацијата што ја добиваат од Фондот изнесува само 48 денари за пациент и не стигнува за покривање на трошоците, поради што постои опасност од затворање на ординациите.

-Во периодот кога бевме целосно затворени, единствено ни следуваше капитација на тие што имаме договор со Фондот за здравствено осигурување. Капитацијата е многу мала, само 48 денари, не стигнува за да се платат трошоците и да се исплатат плати на вработените. Дури и кога се олабавија мерките и ние ги отворивме повторно ординациите, бројот на пациенти се преполови, бидејќи според протоколот за работа мораше да има 30 минути пауза помеѓу пациентите. Најголем дел од ординациите уште пред да се случи пандемијата имаа многу мал профит, под 40.000 денари месечно, а сега ситуацијата е уште полоша, вели д-р Дафина Богеска од Здружението на приватни стоматолози и доктори по дентална медицина.