Една година откако неделата е неработен ден за најголемиот дел од трговците, премолчено се зголемува бројот на дуќани кои се отворени и во тој ден. Законот за трговија не е сменет во делот кој пропишува дека трговците може да работат во недела, само ако се во рамки на трговски центар од 8.000 квадрати. Минатата недела, граѓаните дури добија и пораки дека маркетите на еден од најголемите трговски синџири ќе работи во недела во рамките на моловите во Капиштец и Ново Лисиче, кои реално не се со таа квадратура!?

Интересно е што овие маркети досега одмораа во неделите, па оттука се поставува прашањето што влијаело да се смени нивното работење и дали веќе не важи правилото дека неделата е работен ден само за маркетите во трговските центри кои имаат над 8.000 квадрати? „Слободен печат“ побара мислење од Министерството за економија, но не добие конкретен одговор. Единствено што е јасно е дека на ден пред Нова Година, е објавен нов Правилник за исполнување на минимално-техничките услови (Службен весник бр. 290 од 30.12.2022 година).

-Според член 25 од Законот за трговија, трговијата на мало може да се врши во трговски центри (молови) кои ги исполнуваат минимално техничките услови согласно со прописот од членот 22 став 2 од овој закон. Надвор од трговските центри не е дозволено да се работи во ден недела и за празници. Според правилникот за исполнување на минимално-техничките услови (Службен весник бр. 290 од 30.12.2022 година) во членот 20, став 2, 3 и 4 е предвидено: трговскиот центар (мол) да биде организиран и одржуван како една целина, составен од продажни и други објекти кои се поврзани со заеднички простории вклучувајќи пешачки патеки, сервисни простории, магацини и други помошни простории. Продажните објекти од ставот 2 на овој член се: продавници, киосци и штандови во кои се продаваат следните видови на стоки: прехранбени стоки, облека, обувки, козметика, накит, книги, музика, играчки, спортска опрема, информатичко-технолошка опрема, декоративни и други видови на украси, електрични апарати за домаќинство, мебел, обезбедување услуги и друго. Другите објекти во трговскиот центар (мол) од ставот 2 на овој член можат да бидат најмалку три од следните објекти: банка и банкомат, односно менувачница, аптека, кино, ресторан или штанд за брза храна, кафуле/кафетерија и видови забавни игри (игротека, куглана и друго) – стои во одговорот од Министерството за економија.

Во анализатата насловена „Пропусти во регулативата за недела како неработен ден“ од Мимоза Богатинова Кузмановски, објавена на академскиот блог на Институтот за комуникациски студии „Республика“, авторката меѓудругото го поставува прашањето дали после неполна година нешто се промени?

-Со стапувањето на сила на одредбите за недела како неработен ден, конфузните работодавачи бараа мислења од консултанти и институции во која категорија на субјекти влегуваат и дали воопшто смеат да работат.

Некои работодавачи (како што се кафе баровите) сè уште работат во недела врз база на интерни мислења на надлежни институции, кои не се никаде јавно објавени. Имаше полемики и околу работата во туристичките места, по што се објави листа за опфат на туристички места, а подоцна и таа одредба се редефинираше. Шест месеци откако почна да се применува, Законот за трговија беше дополнет и изменет во однос на одредбите за денот недела, но измените и дополнувањата и не решија многу – објаснува авторката, која е експерт и за трудово право.