На националните избори во Латвија победи партијата Ново единство на премиерот Кришјанис Кариш, велат привремените резултати.

Десничарската партија Ново единство освои 19 отсто од гласовите, покажаа привремените резултати, по што следи Унијата на зелените и фармерите со 12,4 отсто и Обединетата листа со 11 отсто.

Бројките значат дека партијата на премиерот привремено ќе има најмногу места во парламентот со 26. Унијата на зелените и фармерите би имала 16 потенцијални места, а Обединетата листа 15.

Кариш претходно за медиумите изјави дека ќе биде најлесно да се продолжи со истата коалициска влада доколку победи неговата партија, објави АП.

„Прво и најважно во мислите на сите е како сите ние ја преживуваме зимата, не само во Латвија, туку и низ цела ЕУ, и дека сите остануваме обединети зад Украина и не се откажуваме пред тешкотиите за нас“, изјави Кариш за Ројтерс.

Валдис Домбровскис, комесар за трговија на ЕУ и поранешен латвиски премиер, рече дека балтичката земја во моментов „се соочува со многу комплицирана геополитичка ситуација во контекст на руската агресија против Украина“, објави АП.

„Луѓето гласаа за искусна политичка сила со јасен евроатлантски курс, која може да се справи и да ја води земјата во оваа комплицирана ситуација“, изјави Домбровскис пред поддржувачите на Ново единство во главниот град Рига, според АП.