– Преговорите за прекин на огнот меѓу Израел и Хамас, кои се одржуваат во Доха со посредство на Катар, Соединетите Американски Држави и Египет, во моментов се во застој, и покрај средбата меѓу израелскиот премиер Бенјамин Нетанјаху и американскиот претседател Доналд Трамп оваа недела, објави денес Би-Би-Си.

Палестински функционер вклучен во преговорите изјави за медиумот дека разговорите се заглавени поради несогласувања околу механизмот за дистрибуција на хуманитарна помош и одбивањето на израелските трупи да се повлечат од одредени делови на Газа.

Според истиот извор, израелската страна инсистира на продолжување на контролата на испораките на помош преку Хуманитарната фондација за Газа (GHF), која е поддржана од САД и Израел, додека Хамас и другите страни бараат целосна улога за ОН и меѓународните организации.