Акциите на „Леви Штраус“, производител на познатите фармерки „левис“, паднаа за 11 отсто пред отворањето на американската берза, откако компанијата објави дека очекува послаба продажба во претстојната празнична сезона поради воздржаноста на потрошувачите во Европа и во САД. Компанијата исто така додаде дека размислува да го продаде својот бренд „докерс“, поради незадоволителни резултати, пренесува Ројтерс, објави Политика.

„Го стеснуваме нашиот фокус за да го реализираме целосниот потенцијал на брендот „левис“ и да го забрзаме лансирањето на новата линија Бијонд Јога“, рече извршниот директор на компанијата, Мишел Гас.

„Леви Штраус“ претходно се откажа од брендот „денизен“, кој не го донесе очекуваниот профит, и имаше отпуштања во некои региони заради намалување на трошоците. Споменатите чекори се покажаа како добро решение бидејќи „Леви Штраус“ во третиот фискален квартал оваа година оствари прилагодена заработка по акција од 33 центи, надминувајќи ги очекувањата на аналитичарите, пренесува Спутник.