28-годишниот Миле Тодоров од Неготино, кој мистериозно исчезна пред точно четири месеци, завчера бил забележан од негов познаник на планината Серта, на патот Штип-Неготино, тврди семејството, кое за „Фокус” открива детали од средбата.

Тодоров исчезна на 30 јануари, кога утрото тргнал на работа во фирмата „Метал Апостолов“ во Кавадарци, но таму му кажал на сопственикот дека дава отказ, по што заминал пеш во правец на Неготино, а трагата му се губи на патот кај Марена, според очевидци и снимки од надзорни камери.

Како што раскажуваат блиските на Миле, во вторникот им се јавил човек од Кавадарци, кој го познавал исчезнатото момче. Тој им кажал дека утрото околу пет часот, додека возел на регионалниот пат Штип-Неготино, накратко запрел излегол од возилото, и тогаш забележал човек кој се движел од Штип кон Неготино. Кога добро го погледнал, сфатил дека станува збор за Миле, по кого се трага околу четири месеци и веднаш започнал да го довикува.

„Човекот кој го забележал Миле покрај коловозот, речиси на највисокиот дел на Серта, е човек кој добро го знае и нема шанси да се препознал. Кога ни се јави, ни кажа дека откако го забележал, веднаш му викнал: Брату, брату, дојди, застани, но Миле започнал да бега кон шумата. Бил неверојатно ослабнат, преполовен, со жолта брада и подрасната коса, носел жолта маица која била искината. Изгледал очајно, неуредно, во многу лоша состојба, како пола човек. Во раката држел палто“, раскажуваат блиските на Миле.

Тие додаваат дека веднаш се јавиле во полиција и известиле за дојавата, по што екипи на МВР се упатиле кон Серта со кучиња-трагачи и дронови. Но, и покрај масовната потрага, не успеале да го најдат момчето.

„И лицето кое ни кажа дека го видело Миле разговараше со полициски службеници, ги даде сите детали кои ги има. Ова ни даде надеж дека сепак Миле е жив, и најверојатно не сака да биде најден. Од една страна, ова е олеснување за нас како семејство, од друга страна сме презагрижени поради тоа што бил во многу лоша состојба, стравуваме да не му се случи нешто лошо. Размислуваме, што ако падне, скрши рака или нога, ако се повреди… Дури тогаш никогаш нема да биде пронајден во шумата“, велат членовите на семејството.

Тие апелираат до сите кои возат или се движат по патиштата во регионот, да обрнат внимание да не забележат човек во жолта маица, многу слаб и со неуредна подрасната коса и жолта брада. Доколку некој го забележи, веднаш да ја алармира полицијата.

„Не знаеме што се случува, но му веруваме на човекот кој тврди дека е сигурен како лицето забележано на Серта е Миле. Веруваме и дека тој не сака да биде најден, инаку зошто веднаш би побегнал кога човекот му викнал да запре? Ова е мистерија и агонија истовремено низ која минуваме четири месеци, и се надеваме дека конечно ќе го најдеме Миле, дека ќе добиеме одговори на бројните прашања кои не мачат сето ова време. Молиме за помош од јавноста, секој кој ќе забележи лице со описот кој го дадовме, да не се двоуми и да се јави во полиција, велат блиските на Миле за „Фокус“.