Пожарот во јужна Франција што избувна во вторникот во близина на Марсеј, во Пен-Мирабо, сè уште не е изгаснат, а според министерот за внатрешни работи Бруно Ретајо, 110 лица се полесно повредени, вклучувајќи девет пожарникари и 22 полицајци.

Според Ретајо, кој пристигна во Марсеј синоќа и се сретна со локалните власти, 800 пожарникари беа распоредени на местото на настанот синоќа за да се борат со пожарот во текот на целата ноќ.

Телевизијата БФМ утрово објави дека пожарот сè уште не е изгаснат и дека префектурата објавила дека интензитетот на пожарот е намален, но дека сè уште не е локализиран.

И градоначалникот на Марсеј, Беноа Пајан, се огласи, наведувајќи дека се во тек спасувачки операции и дека досега се евакуирани 400 луѓе.

Пожарот, кој избувна во вторникот наутро во округот Буш-ди-Рон, во градот Пен-Мирабо, веќе се проширил во Марсеј, вториот по големина град во Франција, во вторник попладне. Според пожарникарите, пожарот се проширил брзо, носен од северен ветер, а пламените јазици се искачиле до 300 метри во воздухот.

Префектот на департманот Буш-ди-Рон, Жорж-Франсоа Леклерк, изјави дека вчера за гаснење на пожарот биле распоредени повеќе од 700 пожарникари и девет хеликоптери, јавува Танјуг.

Локалната службеничка Мартин Васал на прес-конференција изјави дека пожарникарите спасиле 500 куќи од пламенот, нагласувајќи дека условите на теренот се многу комплицирани и го отежнуваат гаснењето.

Таа нагласи дека ќе биде покрената истрага за причините за пожарот и предупреди дека сè уште постои можност за повторно запалување. Патниот сообраќај беше нарушен околу Марсеј утрово. Државната железничка компанија СНЦФ објави дека железничките услуги до и од Марсеј се делумно прекинати. Аеродромот Екс-Марсеј, четвртиот најголем аеродром во Франција, беше принуден да ги прекине редовните операции во вторник, бидејќи огромен облак чад се креваше над планините северно од градот.

Управата на аеродромот во вторникот попладне соопшти дека воздушниот сообраќај е делумно обновен доцна навечер.