Претставувајќи се како вработена во германската Амбасада во Скопје и Министерството за внатрешни работи, измамничка за пари лажно нудела работни визи за Германија или сертификати за познавање на германскиот јазик. Откако ќе им ги земела парите, потоа повеќе не им се јавувала на телефонските повици.

Од сите оштетени успеала да се стекне со вкупна противправна имотна корист од околу 18.500 евра.

Основното јавно обвинителство Гостивар донесе наредба за истражна постапка за продолжено кривично дело „Измама“.

Осомничената, во периодот од март 2022 до март годинава, прикажувајќи се како вработено лице во Германската амбасада во Скопје и во Министерството за внатрешни работи на РСМ, довела во заблуда осум оштетени лица од Гостивар. Целта и била, искористувајќи исти или слични прилики, да прибави за себе противправна имотна корист, велат од Обвинителството.

Со цел обезбедување во секој од случаите поединечно, надлежниот јавен обвинител најпрвин предложи на два пати по 48 часа притвор за осомничената, а по истекот поднесе и предлог за определување мерка притвор. Со Решение на Основниот суд во Гостивар на осомничената и е определен притвор во траење од 30 дена.​​