Во изминатите денови, Општина Ѓорче Петров постави безбедносни столпчиња на најризичните локации во населбата, со цел да се зголеми безбедноста во сообраќајот, да се намали опасноста од несреќи, но и да се подобри протокот на возила и пешаци. Покрај тоа, со столпчиња треба да се спречи нелегалното паркирање на возила и да се создаде безбедна зона за пешаците, посебно на оние места каде што има интензивен сообраќај.

Во исто време, како што информираат оттаму, се изврши и бележење на пешачките премини на повеќе локации низ општината, што е од особена важност за безбедноста на пешаците, особено на местата каде што децата, учениците и родителите се најчесто присутни. Обележувањето на овие премини ја зголемува видливоста и ја намалува можноста за несреќи со возила.

Во наредните денови, општината ќе продолжи со уште една значајна мерка – поставување на т.н. „легнати полицајци“ или успорувачи на брзина на локации со голема фреквенција на луѓе. Овие т.н. „легнати полицајци“ ќе бидат поставени пред училиштата, градинките и на други фреквентни локации во општината. Оваа мерка има за цел да го намали брзото возење и да обезбеди поголема безбедност за најмладите и сите граѓани кои се движат низ овие делови од населбата. Општина Ѓорче Петров во континуитет работи на подобрување на инфраструктурата и безбедноста на своите жители, вложувајќи во мерки кои ќе ја зголемат сигурноста на сите учесници во сообраќајот -велат од Општината.

Оттаму апелираат до сите граѓани да ги почитуваат новите сообраќајни правила и да се грижат за својата безбедност и безбедноста на другите.