Денеска во центарот на Кичево, официјално беше ставен во употреба првиот млекомат за свежо млеко во Македонија. Жителите на Кичево и околината имаат модерен пристап до свежо кравјо млеко произведено од Земјоделската задруга „Крнино“ составена од членови од Манастирот „Св. Богородица Пречиста“. Млекоматот е обезбеден со средства од Европската Унија преку проектот Агро смарт, спроведуван од Македонската развојна фондација за претпријатија, Хемера и ЦЕП Можности.

– Млекото што се нуди преку млекоматот е свежо, со зачувани природни хранливи својства, без додатоци и конзерванси и во контролирани хигиенски и температурни услови, а освен млеко, потрошувачите имаат можност да си купат и сирењe – рече Станоја Станојовски од Манастирот Света Богородица Пречиста, која е дел од Земјоделската задруга Крнино.

Лазар Неданоски од Македонската развојна фондација за претпријатија потенцираше дека млекоматот е пример како треба да се одвива модернизацијата на македонските фарми и да се осовременува продажбата на локалните земјоделски производи со достапните средства од Европската Унија.