Во Порта Македонија денеска беше промовирана поштенската марка по повод 80 години од кодификацијата на македонскиот стандарден јазик. Поштенската марка е изработена од бирото за филателија на Македонски пошти, а дизајнот е на Лариса Донев. Номиналната вредност е од 36 денари, а е испечатена во тираж од шест илјади примероци.

– Поштенските марки се амбасадор на една држава, така што ова мало парче уметничко дело исто како пишаниот збор патуваат и ја претставуваат културата и традицијата на Република Македонија. Поштенската марка нека биде доказ за љубовта кон нашиот јазик на кој се напишани безброј дела на нашите македонски автори, дела преведени во светската литература – порача директорот на поштенскиот сообраќај Бојан Кереместевски.

За министерот за култура, Зоран Љутков поштенските марки се дел од минатото, но сепак се сведоштво на трајност, а токму тоа претставува и македонскиот јазик – трајна вредност, што ги преживеала времето, притисоците и обидите за негирање.

– Низ годините нашиот јазик изгради мостови: од селските училишта до големите универзитети, од народната песна до современата книжевност. Го зборуваат стари и млади, дома и во дијаспората, на улица и на сцена. Со овие зборови го започнувам денешново обраќање бидејќи нема ништо поважно за еден народ од неговиот јазик. Тој не е само средство за зборување, тој е срцето на нашата историја, борба и љубов кон зборот, кон коренот, кон татковината – порача Љутков.

Симона Груевска Маџовска која е координатор на активностите за одбележување 80 години од кодификација на македонскиот стандарден јазик, сподели детали за активностите кои ќе се одвиваат во текот на целата година во рамки на овој јубилеј.

– Можам да кажам дека направивме богата програма која веќе се реализира во голем дел, но ќе се реализира и понатаму до крајот на годината. Познато е дека централните настани беа на 5 мај кој е ден на македонската азбука, овој настан гледавме да биде блиску до 7 јуни, бидјеќи тоа денот кога е донесена револуцијата за македонскиот правопис. Веќе се органиизрани голем дел од активностите, ќе имаме меѓународни научни конференции на Филолошкиот факултет „Блаже Конески“ и на Институтот за Македонски јазик „Крсте Мисирков“, активности на државниот Факултет во Тетово на Универзитетот во Штип, Педагошкиот Факултет во Битола и понатаму ќе продолжиме, секако вклучени се и други институции како што е Универзитетската библиотека „Климент Охридски“ – информира Груевска Маџовска.