Според најновите податоци од Хрватскиот институт за пензиско осигурување, вкупно 2.902 лица примаат пензии како поранешни припадници на Југословенската народна армија (ЈНА). Иако бројот на корисници на оваа пензија се намалува од година во година, просечниот износ континуирано се зголемува и моментално изнесува 692,41 евра. Ова е за дури 50 евра повеќе од просечната вкупна пензија во Хрватска, која во мај изнесуваше 642 евра, пишува „Вечерњи.хр“.

Од вкупниот број корисници на пензија од ЈНА, 1.703 се жени, додека 1.199 се мажи. Мнозинството се корисници на семејни пензии – дури 1.724 лица – меѓу кои жените се огромно мнозинство со 1.663 корисници. Ова укажува дека многу сопруги ја презеле пензијата по смртта на своите сопрузи, поранешни припадници на ЈНА.

632 лица во оваа категорија примаат старосна пензија, додека 546 корисници примаат инвалидска пензија. Просечната пензија за мажи е 758,53 евра, додека за жени е значително пониска – 645,86 евра.

За споредба, минатата година, 3.247 лица примале ваков вид пензија, што е за 345 повеќе од денес. Во исто време, просечната пензија била помала – 628,71 евра. Во споредба со денешниот износ, разликата е речиси 64 евра.

Трендот на намалување на бројот на корисници е уште поизразен ако се погледат податоците од 2022 година, кога имало 4.202 корисници на ЈНА пензија. Просечната пензија тогаш изнесувала само 462,27 евра.