Поранешниот телохранител на израелскиот премиер Бенјамин Нетанјаху, Ави Дрор, стана водач на протестите каде што Израелците бараат прекин на војната, а тој вели дека неговиот израелски лидер ја продолжува војната само за да избегне истраги и затворање, јавува Тајмс оф Израел.

Дрор додаде дека Нетанјаху повеќе не е истата личност и дека направил сè за да стане модерен диктатор и успеал.

„Тоа е единствениот начин да избегне затвор. Ние во Израел имаме премиер и влада кои работат на продолжување на војната, а тоа е исклучиво за политичките интереси на Нетанјаху. Ја поддржувавме оваа војна во првите 12 месеци, но оттогаш таа стана неприфатлива“, рече Дрор во интервју за италијанскиот весник „Република“.

Тој вели дека затоа станал водач на движењето кое се стреми да ја запре војната.

„Во Израел во моментов се случуваат две работи: едното е војна, а другото е војната на владата против судскиот систем, чиј последен чин е обидот да се замени државниот обвинител“, рече Дрор, кој сведочеше и пред Врховниот суд во Ерусалим во случајот против Нетанјаху.

Поранешниот телохранител на израелскиот премиер вели дека се придружил на антивоените протести и излегол на улиците како и многу други израелски граѓани, објави весникот.

„Оној кој сè уште очекува Нетанјаху да покаже милост не сфатил дека разбира само сила. Тоа е она што го правиме на овие протести – треба да ги окупираме улиците, патиштата, да испланираме нови акции“, заклучи Дрор.