МЗТ Скопје во петок од 18:00 часот го игра клучниот натпревар за опстанок во АБА лигата и тоа на домашен терен против Цибона, поранешениот европски шампион.

На „металците“ им одговара само победа, но ќе треба да чекаат и на резултатите на конкурентите. Најважно е тие да си „завршат работата“ и да слават, секако за такво нешто потребна е и голема поддршка од публиката.

Денес од таборот на МЗТ Скопје потсетија на ситуација пред 13 години порачувајќи дека не се предавале ниту тогаш, па нема ниту сега.

Луѓето кај нас брзо забораваат некои работи, тоа е генерален проблем со кој се соочуваме како народ. Оваа слика е направена пред точно 13 години што како временска рамка и не е така далеку.

Во изминатиот период актерите на овој настан се оженија, добија деца, други се отселија, некои се вратија, голем дел се успешни луѓе, а за жал некои од нив и не се веќе со нас. Во тој период МЗТ Скопје израсна во уште поголем клуб збогатувајќи ја ризницата трофеи со преку 20 парчиња, и сите ние сме директни виновници на некој начин за тие успеси.

Сепак, вреди да се потсетиме дека требаше да се помине многу трнлив пат додека се стигне до тоа ниво и токму од тука (и секако цела таа сезона) штркот ги рашири крилјата и не планира уште долго време да ги спушти. Затоа, иако сега борбата не е за трофеј туку за опстанок, натпреварот со Цибона ќе има буквално исто па дури за некого и поголемо значење.

Не се предадовме тогаш, нема ни сега! Полна сала за полно срце и голема победа за Аеродром, Скопје и Македонија.