Армијата на САД објави дека престанала да му дава плата и придонеси на Гордон Блек, 34-годишниот водник што во јули во Русија беше осуден на четири години тешка робија поради кражба и закана за убиство.

Блек на 2 мај беше приведен во Владивосток по расправија со својата партнерка, Русинката Александра Вашчук, која ја сретнал додека бил на служба во Јужна Кореја. Додека бил на отпуст, тој ја следел до Владивосток, каде што девојката го пријавила дека од чантата ѝ украл 10.000 рубли (116 долари) и ѝ се заканувал. Руските власти објавија дека апсењето на американскиот војник на руска територија нема никаква политичка заднина. Блек во јуни беше изведен пред суд, каде што признал дека ѝ украл пари „поради нужна потреба“, но го отфрли обвинението за смртна закана. Судот го прогласил виновен и му изрекол казна од 4 години во казнено-поправен дом.

Вашингтон вообичаено вложува максимални напори за да ги ослободи американските државјани, особено воените лица, приведени во други земји, но во случајот на Блек се закани дека ќе го приведе водникот ако се врати во Америка. Армијата објави дека тој прекршил многу правила – без дозвола отпатувал во Русија, и тоа со лет преку Кина, а и стапил во вонбрачна врска иако армијата го финансира престојот на неговата сопруга и ќерката близу касарната Форт Кавазос во Тексас.

– Кога Блек ќе се врати во САД, ќе има последици, исто како што војникот Кинг трпи последици за своето неприфатливо однесување – изјави за Ројтерс неименуван американски дипломат.

Тој алудирал на случајот на војникот Тревис Кинг, кој лани беше приведен во Северна Кореја. Откако САД по дипломатски пат издејствуваа негово ослободување, во октомври Армијата го обвини за дезертерство и низа други кривични дела.