Речиси половина од урбаното население во Иран се соочува со сериозен недостиг на вода за пиење, изјави Хашем Амини, раководител на државната компанија за водоснабдување, пренесе новинската агенција Тасним.

„Според проценките, 52 градови во 29 провинции – меѓу кои и Техеран, Машхад, Исфахан, Арак, Бандар Абас и Јазд – се погодени од водна криза. Тоа значи дека околу половина од урбаното население се соочува со недостиг на вода за пиење“, изјави Амини.

Тој посочи дека за помалку од три децении, обемот на обновливи извори на свежа вода во Иран е намален за повеќе од 30 отсто – од 132 на 90 милијарди кубни метри. Истовремено, потрошувачката на вода значително е зголемена.

„Водата не е само потрошувачко добро – таа е основа на безбедноста, здравјето, економијата и развојот. Ако денес не управуваме правилно со неа, утре можеби нема да можеме да ја поправиме состојбата“, предупреди Амини.

Компанијата за водоснабдување во Техеран им препорача на граѓаните кои живеат во повеќекатници без резервоар и пумпа да инсталираат такви системи, за да го ублажат ефектот од падот на водниот притисок.