Полска и Финска размислуваат за обновување на своите мочуришта како дел од новата стратегија за заштита на границите, објавува Политико. Се вели дека пристапот има двојна намена – зачувување на природата, а воедно и зајакнување на безбедноста од потенцијална закана од исток.

„Ова е ситуација од која сите добиваат и која постигнува неколку цели одеднаш“, рече Тарја Харанен, генерален директор за прашања поврзани со природата во финското Министерство за животна средина.

Според извештаите, претставници од Полска и Финска активно проучуваат како мочуриштата би можеле да станат дел од одбранбен систем. Бидејќи повеќето од овие области во Европа се наоѓаат веднаш до руската граница, нивното обновување, покрај еколошкиот ефект, би можело да има и воено значење – создавање потенцијални стапици за камиони и тенкови.

Се потсетува дека кон крајот на март оваа година, четири американски војници ги загубија животите во Литванија кога нивното оклопно возило се заглави во мочуриште за време на вежба и се преврте за време на евакуацијата. Инцидентот дополнително го насочи вниманието кон природните бариери како безбедносен фактор во регионот.