„Една трагедија за која не се откриле и казниле соодветно злосторниците води во друга и затоа станавме земја во која обичниот човек не се чувствува безбедно“, велат за „Фокус” родителите на Марина Арсова од Кочани, која е исчезната повеќе од девет години, од 29-ти декември 2015 година.

Тие сето тоа време неуморно бараат одговори за судбината на нивната ќерка, а периодов посебно ги загрижило тоа што инспектори, односно началници кои работеле на нејзиниот случај, завршиле во притвор поради трагичниот пожар во дискотеката во Кочани. Родителите велат дека не знаат каде да се обратат, немаат информација кој сега ќе го води нерешениот случај и дали воопшто тој ќе се води. Бараат од Министерството за внатрешни работи да именува нови инспектори кои професионално ќе се посветат на потрагата по нивната ќерка.

Марина, тогаш 32-годишна мајка на две девојчиња, од кои сега едното е полнолетно, исчезнала од својот дом во Штип. Сопругот забележал дека ја нема вечерта, кога се вратил од селото каде одгледувал стока, а наредниот ден го пријавил исчезнувањето во полиција. Потрагата по неа започнала по 48 часа, бидејќи се работело за возрасна жена. Еден месец по нејзиното исчезнување, пак, се самоубил свекорот на Марина, со што се продлабочила мистеријата околу случајот. Официјално, до денес нема трага од младата жена и таа се води како исчезнато лице.

-Нашата агонија трае со години! Како може да не се реши случајот кога млада жена и мајка исчезнува од својот дом без трага, како може постојано да се менуваат инспектори, началници, па дури и обвинители кои работеле на случајот, како може да знаеме дека оние, новите кои доаѓаат, ќе се посветат на нашиот случај, ќе го проучат комплетно, дека ќе нема пропусти во нивната истрага? Еден од сега приведените е поранешниот началник од Штип, Боби Гидиоски. Тој работеше на случајот со Марина. И други службени лица кои се приведени беа во тек со случајот, па не интересира, оние кои сега дошле на нивните работни позиции, дали ќе продолжат да ја бараат нашата ќерка? Никој не ни се јавил, со никого не сме разговарале, а сакаме да знаеме кој е надлежен за нашиот случај. Бараме новите инспекторски кадри да не контактираат, бараме ажурност, сакаме да бидеме во тек со настаните и со истрагата, ако воопшто се води истрага. Толку многу луѓе досега се сменија, никој не покажа напредок, никој не откри ништо. Таа е наше дете и ние не можеме да се помириме со тоа дека едноставно ја снемало, ја бараме вистината, низ солзи раскажуваат родителите, Ленче и Николчо Цветкови, барајќи новите полициски кадри да ја обноват истрагата.

„Имавме многу немили случки додека гледавме со каква неодговорност ни пристапуваа надлежни службеници, првата година кога Марина исчезна доживеавме дури и полициски началник да нè праќа во Велес, да одиме кај некој видовит човек, тој да ни помогнел. Каде го има тоа?“, прашува таткото на Марина, кој додава дека од изјавите на сегашната власт дека конечно системот ќе започнел да функционира, имал надеж дека можеби и на нивниот случај ќе му се посвети внимание и дека ќе бил изваден од фиока.

Но, како што вели Цветков, кога гледал дека помеѓу надлежните службеници имало и лица кои со години не оствариле напредок во истрагата за нивниот случај, се прашувал како тие, истите кадри ќе можат да се носат и со новите случаи.

Прочитајте го целиот текст на „Фокус“.