Министерството за внатрешни работи информира дека се завршени проверките и е утврдено дека пријавите за поставени бомби во деветте училишта што денеска ги добиле, се лажни

Девет училишта и денеска добија закани за поставена бомба. Од МВР претходно потврдија дека закание пристигнале преку електронска пошта попладнево околу 14 часот.

„Министерството за внатрешни работи ја известува јавноста дека се направени сите потребни проверки во врска со денешните пријави дека девет училишта на територија на Скопје добиле мејл со закана за поставена експлозивна направа, и утврдено е дека станува збор за лажни пријави. Веднаш по добиените пријави, од полициски службеници се преземени мерки за безбедно евакуирање на училиштата, а потоа се извршени и детални проверки од тимови за антитерористички проверки и утврдено е дека станува збор за лажни пријави“, се наведува во најновото соопштение од МВР.

Анонимните дојави за поставени бомби пристигнуваат втор ден по ред, откако вчера беа испратени во осум скопски училишта.