Затворски полицаец во КПУ Затвор-Штип бил вербално па физички нападнат од осуденик, при што добил исеченица на главата.

Кривичното дело било извршено вчера околу 9 часот, а нападнатиот вработен во затворот го пријавил случајот во 9.32 часот во СВР Штип.

Како што информира МВР денеска во дневниот билтен, додека пријавителот бил на своето работно место во КПУ Затвор-Штип, заедно со други затворски полицајци, на осуденикот му наредил да го предаде мобилниот телефон.

-Бил вербално нападнат од истиот со закани по неговиот живот и животот на неговото семејство. Потоа со стаклена чаша осуденикот го удрил пријавителот во пределот на главата нанесувајќи му телесна повреда-посекотина, соопшти МВР.

За настанот е запознат Јавен обвинител од ОЈО-Штип и се работи на расчистување на случајот.