Потпишување каков било договор со Русија за ставање крај на војната со Украина би значело потпишување „договор со ѓаволот“, рече Михаило Подољак, главен советник на украинскиот претседател Володимир Зеленски, додавајќи дека договорот за ставање крај на војната само ќе му купи време на рускиот претседател Владимир Путин за да ја зајакне својата војска и да отвори уште едно, како што оцени, „потенцијално понасилно поглавје во војната“.

– Ако сакате да потпишете договор со ѓаволот, добро, само напред. Тоа е Русија – рече Подољак во интервју за АП, одговарајќи на прашање за изгледите за постигнување мировен договор со Москва.

Подољак смета дека потпишувањето на договор со Русија во овој момент би значело дека Москва нема да биде правно одговорна за масовните злосторства во Украина, како и за продолжување на војната во различни размери и со други протагонисти.

– Да, тоа може да биде замрзнување на конфликтот за одреден временски период. Но, тоа значи дека Руската Федерација ќе ги исправи своите грешки и ќе ја зајакне сопствената армија. Земјата агресор не дојде на територијата на Украина за да потпише мир, договор со таа земја, е тоа е глупост!“- рече Подољак.

Зеленски неодамна ја покажа својата подготвеност да преговара со Русија за прв пат од почетокот на руската инвазија на Украина, наведувајќи дека Москва треба да испрати делегација на следниот глобален мировен самит што се очекува да се одржи во ноември.

Досега Зеленски одбиваше да преговара со Русија додека на власт е рускиот претседател Владимир Путин.

Кога станува збор за претседателските избори во САД во ноември, Подољак изјави дека Украина ќе продолжи да има силни односи со САД, без разлика дали ќе победи републиканскиот или демократскиот кандидат.

„Без разлика кој ќе биде во Белата куќа, не гледам сценарио каде што е можно да се запре помошта за Украина“, рече Подољак.