Поранешниот американски претседател денеска пред судот во Њујорк ќе се соочи со обвинувања дека ја силувал новинарката Елизабет Џин Керол во стоковна куќа на Менхетен во 1990-тите, пренесува „Би-Би-Си“. Керол го тужеше Трамп минатата година, откако новиот закон во Њујорк дозволи тужби за наводни сексуални злосторства дури и по истекот на статутот на застареност.

Керол тврди дека Трамп ја закачил „на ѕид“ во соблекувалната, насилно и ја соблекол облеката и ја нападнал, пред таа да побегне на Петтата авенија и да повика пријател. Поранешниот претседател негираше дека ја познава Керол и постојано тврдеше дека наводите не се веродостојни, тврдејќи дека колумнистката „воопшто не е негов тип“.

Керол и нејзините двајца пријатели, на кои таа наводно им се јавила веднаш по нападот, треба да сведочат пред судот. Нејзините адвокати, предводени од Роби Каплан, ќе се обидат да покажат модел во однесувањето на Трамп и дека децениските тврдења на нивниот клиент се во согласност со другите тврдења, пишува „Фајненшл тајмс“.

Се очекува да сведочат и Наташа Стојноф и Џесика Лидс, кои изнесоа свои обвинувања против Трамп во 2016 година. Судијата Луис Каплан во март пресуди дека тимот на обвинителството може да користи снимка на која Трамп се фали дека ги фаќа жените за нивните гениталии како доказ.

Не е јасно дали Трамп ќе се појави пред судот или ќе сведочи во своја одбрана. Минатата недела адвокатите на поранешниот претседател побараа од судијата да и објасни на поротата дека постои можност Трамп да не се појави поради логистички предизвици. Судењето ќе трае две недели.

Жирито ќе биде избрано од група од приближно 150 луѓе, а имињата на членовите на жирито ќе се чуваат во тајност за да се заштитат од вознемирување. Судењето во јужниот округ на Њујорк доаѓа само неколку недели откако Трамп се појави пред судот на Менхетен во случајот со Сторми Далниелс.