За две години Скопје требаше да добие пречистителната станица за отпадни води, но нејзината изградба сѐ уште не е ни почната. Станицата треба да се гради во близина на Трубарево и со неа да се овозможи примарен и секундарен третман на отпадните води, поточно безбедно да се третира и прочистува водата за 540000 жители и на тој начин да се стави крај на испуштањето фекалии во Вардар.

За изградбата на пречистителна станица парите се веќе обезбедени, од ЕУ  неповратен грант од 70 милиони евра, за што Владата уште пред година и пол потпиша договор, додека преостанатите средства од околу 137 милиони евра преку кредит од Европската инвестициска банка и Европската банка за обнова и развој.

Во меѓувреме, избрани се фирмите што ќе ја градат станицата „Жикол“ и „ВТЕ“, а на почетокот на годинава беа префрлени на сметката на Министерството за животна средина 10 милиони евра, пари со кои треба да почне изградбата на овој проект, кои потоа Министерството требаше да ги префрли на фирмите изведувачи.

Минатата есен поранешната министерка за животна средина Каја Шукова посочи дека за да почне изградбата, потребно е Град Скопје да ја заврши експропријацијата на земјиштето и урбаното планирање.

Со грант од 70 милиони евра обезбедени парите за пречистителната станица, уште да се потпишат договори за изградба и надзор

Што и како е завршено не е познато, а градоначалничката Арсовска на вчерашната прес-конференција немаше конкретен одговор што се случува со пречистителната станица и посочи дека за прогресот се информирала преку извештаите што ги добивала од ЈП „Водовод и канализација“.

 Прво прогресот беше во фаза на застој затоа што две општини, Гази Баба и Аеродром, имаа застој во деталните урбанистички планови што требаа да ги донесат. Во моментов кога овие две општини ги донесоа ДУП-овите, од тој момент почнува процедурата на собирање и составување на документацијата што е правно неопходна за да може да се извадат градежни дозволи и сето она што треба за да отпочнат со проектот. Значи, проектот не е само да сакате туку проектот мора да биде издржан затоа што утре некој, како вчера министерот, ќе почне да мавта со разни ливчиња и со членови од закон за да прави некаков крими прогон – рече Арсовска.

Како што посочи таа, имало редовни состаноци меѓу претставници на банките и јавното претпријатие, имало тим што работи на проектот од каде што редовно ги известувале. Таа тврдеше дека не може да зборува за нешто што не е нејзина надлежност.

Не би знаела да кажувам нешто што ниту е моја ингеренција ниту е моја надлежност ниту, пак, искрено да ви кажам, треба да го коментирам, затоа што нашата насока тука е по извештаите што ги добиваме од ЈП „Водовод и канализација“, а што претходно во првата година не ги добивавме, да бидеме информирани за текот на работите. Не сум кажала дека не ме интересира туку дека не можам да давам паушални изјави на кои прецизен одговор ниту имам ниту сум побарала. Доколку сакате целосна транспарентност, тогаш секој од извештаите што ги добиваме и записниците од тие состаноци, доколку нема некој некоја клаузула, ќе ви ги испратиме на увид, гледајте ги, читајте ги за да бидете целосно информирани – одговори Арсовска на обвинувањата од новинарите дека не е заинтересирана за овој проект.

Пречистителната станица „тапка во место“: Тендерот завршен, Арсовска не го потпишува договорот

Пречистителната станица беше предмет на големи недоразбирања откако пред две години Арсовска обвини дека функционери на ВМРО-ДПМНЕ биле вмешани во малверзации со тендерот за изградба на пречистителната станица и го разреши тогашниот директор на „Водовод и канализација“, а сега министер за локална самоуправа, со обвинување дека го „брцнал рачето во медот“ во врска со тендерот околу прочистителната станица. Тоа беше почеток на „расколот“ меѓу Арсовска и партијата што ѝ помогна да биде избрана, а таа во следните недели ги разреши сите директори на јавни претпријатија во Скопје од ВМРО-ДПМНЕ и постави свои луѓе.

Поради обиди за влијание што се сметаат за тенденција која ги потврдува основаните сомнежи на Град Скопје за самоволие и несоодветно постапување во постапката за избор на изведувач на тендер вреден 136 милиони евра, за изведба на пречистителна станица, Перински е разрешен во петокот на 9.9.2022 година – соопштија тогаш за разрешувањето од Град Скопје.

Во моментов фекалиите на жителите од главниот град се испуштаат како непречистени директно во Вардар, што беше повод за неодамнешната протестна уметничко-скулптурна акција, поставена во реката Вардар. Акцијата ја спроведе Центарот за современи уметности како повик кон властите за конечно почнување со изградба на пречистителната станица.

Пречистителна станица е ургентна потреба. Вардар гледаме дека е син, меѓутоа тој е петта категорија загаден. Практично, сѐ почесто станува мртва река заради загадувањето, кое дел е од индустриски капацитети, меѓутоа дел е и од фекалната канализација – истакна Никола Писарев од Центарот.