Ѓубре и пластични амбалажи, гранки, треви и секаков друг недефиниран отпад ја загадува реката Вардар, а деновиве „понудата“ на пловечки објекти по реката се зголеми со цело стебло од дрво.

Рекреативците на кејот навистина можат да „уживаат“ и да се исчудуваат на глетката на матните речни води во кои со години закотвени стојат три галии од кои едната изгорена и полураспадната, во прежалните жални врби, во нефункциналните фонтани кои служат единствено околу нив да се собира ѓубре. Отпадот во реката стана секојдневна глетка, која воопшто не ги загрижува надлежните.

Од Град Скопје во изминатите години се пожалија дека отпадот во Вардар доаѓа од населените места по неговиот горен тек, каде континуирано се фрлаат големи количини пластични амбалажи, шут и кабаст отпад, кој потоа пристигнува во Скопје, каде било невозможно да се чисти секојдневно. Па ако се знае од каде доаѓа, тогаш нели може да се направи нешто да се спречи оваа појава?

Прашање е од каде доплови стеблото. Дали е некое паднато дрво од Градски парк, дали некој намерно го фрлил и најважно кој ќе го извади од реката? Можеби, како и со ѓубрето, локалните скопски власти и јавни претпријатија ќе го игнорираат додека не отплови од нашиот град. Така е наједноставно, други нека му мислат како и дали ќе го вадат од реката.