По вчерашната реакција од иницијативата „Спас за Волково“ преку која најавија радикализација, протести и граѓанска непослушност доколку нема итно асфалтирање на раскопаната и оштетена главна улица, чија реконструкција била сопрена повеќе од девет месеци, денеска екипи на ЈП „Улици и патишта“ започнаа со довршувањето на овој проект.

Со месеци раскопана главната улица во Волково, жителите се заканија со протести 

Жителите на Волково се заблагодарија на брзата реакција и граѓанската поддршка која ја доби нивната иницијатива.

-По силната реакција на граѓаните и поддршката од медиумите, конечно започна реконструкцијата на оштетената улица во населбата Волково, која подолго време претставуваше сериозен проблем за жителите и нивната безбедност. Изразуваме благодарност до сите институции, поединци и медиуми кои се заложија за решавање на проблемот и покажаа дека кога заеднички се делува, може да се постигнат резултати – велат од иницијативата „Спас за Волково“.

Оттаму додаваат дека и покрај брзата реакција на Градот, очекуваат целосна реконструкција и изградба на нова квалитетна улица, а не, како што велат, само привремено пополнување на дупките.