Кабинетот на израелскиот премиер Нафтали Бенет  објави дека обврската за носење маски во затворени простории, едно од ретките преостанати ограничувања наметнати поради пандемијата на коронавирус, ќе биде укината во сабота во 20 часот.

Како што е наведено поради падот на заболени и починати во земјата, Бенет и министерот за здравство на Израел, Никан Хоровиц, се согласиле да го укинат ова ограничување, кое генерално не се почитувало.

Сепак, маските сè уште ќе бидат задолжителни „на места каде што има голем потенцијал за инфекција“, како што се болниците, домовите за стари лица и авионите. Оние кои одат во карантин мора да носат и заштитна маска.

Одлуката за прекин на оваа обврска сепак мора да биде одобрена од Здравствениот комитет на израелското собрание (Кнесет).

Откако маските станаа задолжителни во април 2020 година, Израелците мораа постојано да ги носат во затворени простории, освен десет дена во јуни минатата година, кога ограничувањето беше накратко укинато пред брзо повторно да се воведе поради зголемените случаи на инфекција, пренесува Бета.

Во Израел, бројот на заразени, новозаразени, и смртни случаи од Ковид-19 се намалува од недела во недела.

Според Министерството за здравство, во моментов има 32.480 активни случаи на заразени со коронавирус, а хоспитализирани се 222 лица во тешка состојба. Од почетокот на пандемијата во Израел, починале 10.647 луѓе.