По четири години од почетокот на проектот за чистење и уредување на речното корито на реката Серава, градоначалникот на Општина Бутел Дарко Костовски означи почеток на втората фаза од уредувањето на коритото, кое и по неколку интервенции, на неколку локации сѐ уште е исполнето со ѓубре и го блокира течението на водата и движењето на водниот животински свет.

Ѓубриштето го блокира речниот тек

За жал, поради големите количини ѓубре фрлено во речното корито, реката Серава, чиј тек почнува во подножјето на планината Скопска Црна Гора и минува низ селата Радишани и Бутел и се влева во Вардар, на неколку места речиси е целосно запрена.

– Почна втората фаза од уредување на речното корито на реката Серава, проект што 40 години им беше ветуван на граѓаните на општината Бутел – информира Костовски на Фејсбук.

Чистење на речното корито на Серава е едно од најголемите барања на бутелчани, кои подолго време го потенцираат овој проблем на социјалните мрежи, незадоволни од бавното темпото со кое се одвива овој општински проект, најавен во предизборната кампања на актуелниот градоначалник.

Претходно, „Слободен печат“ го истакна проблемот со речното корито на реката Серава, поточно состојбата кај мостот кој минува преку неа на улицата Александар Урдаревски, која води до гробиштата Бутел.

Освен ѓубре во коритото, покрај Серава „никна“ и дива депонија

На таа локација имаше и огромна дива депонија, но тогаш од Општина Бутел не ни одговорија кога ќе го исчистат премногу валканото речно корито и зошто на кејот на реката се дозволи да се појави дива депонија. Под мостот беше евидентно дека водостојот е видливо намален, а количината ѓубре што веројатно со текот на времето само се зголемувала, дополнително го попречува текот на реката.

Жители што живеат во непосредна близина на мостот во населбата Бутел 1, велат дека со години никој од Општината не го исчистил коритото на реката и дека самите тие повеќепати биле сведоци како несовесните граѓани фрлаат ѓубришта од мостот директно во реката.

– За жал, поминувам одовде често, тука живеам, но и оттука одам накај гробиштата Бутел. Ова е вистинска депонија што е дом на секакви ѓубришта, а не е само текот на Серава, туку и на зелената површина околу реката, која е целосно узурпирана и уништена со планини од ѓубре – вели еден од жителите за „Слободен печат“ и смета дека Општина Бутел треба што побрзо да се справи со овие депонии, иако веќе доцни неколку години.

Коритото на реката и околината се преполни со пластични кеси со ѓубре, пластични канти, ќерамиди, штици, стаклени шишиња и друго ѓубре, а колку Општината не се грижела за овој простор, покажуваат и израснатите дрвја околу реката, чиј корен доаѓа директно од речното корито.

Четиригодишниот проект веројатно ќе ја дочека својата реализација

За почетокот на чистење на коритото на Серава, проблем кој според граѓаните се провлекува со децении, од Општината за првпат информираа уште во 2021 година, на почетокот на мандатот на Костовски. Денеска, четири години подоцна од почетокот на масовната акција, но по некоја случајност и непосредно пред локалните избори во октомври годинава, од Општината соопштија дека проектот е во напредна фаза и за скоро би бил завршен.

При оваа втора фаза, покрај уредување и поставување камен во должина на речното корито на Серава, паралелно во тек е и изградбата на кејот и паркот покрај реката каде жителите ќе можат да пешачат и да се рекреираат.

– Почнавме со изградба на втората фаза од речното корито на река Серава. Овој дел е во должина од 300 метри. Вкупно ќе бидат уредени со камен 1800 метри од коритото на река Серава. Во завршна фаза е и патеката во должина од 800 метри и паркот што ќе се протега на површина од 5000 метри квадратни – информираше градоначалникот додавајќи дека за уредување на речното корито и за трим-патеката ќе се инвестираат 65 милиони денари.

По многубројните реакции на граѓаните во изминатиот период околу нечистото корито, пред еден месец од Општината информираа дека е исчистено, притоа истакнувајќи дека надлежноста за оваа акција паѓа на „плеќите“ на Град Скопје, но очигледно работата не е завршена до крај, туку само делумно.

– По неколку дописи од Општина Бутел до Градот Скопје, денеска излегоа екипи да го чистат коритото на река Серава, реката се чисти во пределот што е под ГУП, според закон и надлежност на Град Скопје. Благодарност за реакцијата, со ова спасивме потенцијално излевање на реката во овој дел на Општина Бутел – истакна тогаш градоначалникот на Општина Бутел, Дарко Костовски.

По оваа објава, жителите го искажаа своето незадоволство за делумното чистење на реката поради кое сѐ уште постои опасноста за нејзино излевање, а и на некои места е оставено ѓубрето.

– Целото речно корито да се исчисти, не само делумно! Нагоре пред последната постојка на автобусот број 57 е заборавено коритото, потребно е да се излее реката и да влезе во куќите за некој да дојде и да го исчисти речното корито – беа дел од коментарите на бутелчани.