Две недели по спектакуларното бегство на осудениот убиец Беким Мемети од затворската полиција на патот од КПУ „Идризово“ кон Ургентниот центар „Мајка Тереза“, од Министерството за внатрешни работи не излегоа никакви информации ниту за можната насока на неговото движење, ниту за евентуалното проширување на листата на можните помагачи при бегството, во и надвор од затворот. Во меѓувреме, она што како интересен детаљ го откри националниот координатор за гранично управување и искусен безбедносен експерт Владимир Пивоваров, е дека полицијата, прегледувајќи ја содржината на надзорните камери на граничните премини, најмногу се задржала на снимките од најблискиот северен граничен премин, Јажинце.

– Се разбира дека тие веднаш побараа, а ние им ги ставивме на располагање сите расположиви снимки од граничните премини, веднаш по бегството. Тоа се, навистина, обемни материјали, а колегите од полицијата најмногу се задржаа на снимките од Јажинце. Дали и што утврдиле, тоа оттаму треба да го кажат – изјави Пивоваров.

На прашањето од каде претпоставката дека бегалецот успеал да стигне до границата и да ја премине и дали службите, можеби, не реагирале на време за да го спречат бегството надвор од државата, Пивоваров е категоричен дека сите активности се преземени навреме.

– Ние бевме веднаш известени за бегството, во реално време, за да го ставиме на стоп листата и во моментот отпочнавме со засилено набљудување на границите. Сите тие активности се уредно нотирани – категоричен е Пивоваров.

Тоа, заедно со досегашното искуство со бегствата на осудените, но и на неосудените бегалци од законот во државава, може да упатува на заклучок дека Мемети, веројатно, е засолнет некаде на Косово, на што, впрочем, и се сведуваат сите досегашни шпекулации во јавноста.

Ќе има смена на директорот на Управата за извршување санкции Марјан Спасовски

Молкот на полицијата, но и на Обвинителството продолжува и во однос на изјавите на веднаш притворените командирот и затворските полицајци од „Идризово“.

Кривичниот суд, пред една недела, им го продолжил притворот за уште 30 дена на командирот и на затворските полицајци осомничени дека го помогнале бегството на затвореникот.

Беким Мемети, кој во моментов се бара со меѓународна потерница, малку пред полноќ на 12-ти овој месец, им избега на затворските полицајци од комбето со кое, надвор од утврдената процедура, го превезувале во Ургентниот центар „Мајка Тереза“. Бегството се случило на автопатот помеѓу Идризово и Скопје, откога Мемети му го одзел пиштолот на возачот вработен во затворска полиција, пукал и го ранил едниот од полицајците, а потоа влегол во патничко возило „ауди“ кое претходно му го попречило патот на затворското комбе.