Германската централна банка во вторникот објави дека ја затворила 2024 година со загуба, првпат од 1979 година, со исцрпени резерви за покривање на загубите предизвикани од јазот во приходите и расходите од камати. Во 2024 година, Бундесбанк забележа загуба од околу 19,2 милијарди евра. Загубата е можна и годинава, иако помала, предупредија од Банката, пишува Феникс магазин.

„Врвот на годишните оптоварувања веројатно е зад нас“, рече претседателот на Бундесбанк Јоаким Нагел на презентацијата на деловните резултати во Франкфурт. Централната банка работеше со загуба и во 2023 година, од речиси 21,6 милијарди евра, но ја покри со резерви кои сега се речиси целосно исцрпени. Влегувајќи во 2024 година, Бундесбанката имаше само 700 милиони евра резерви за покривање на загубите. Нагел веќе пред една година предупреди дека очекуваат „значително финансиско оптоварување“ и во 2024 година, што „веројатно ќе ги надмине преостанатите резерви“.

Во 2024 година, каматните расходи на Бундесбанката беа повисоки од приходите од камати за 13 милијарди евра. Во 2023 година тие беа за 13,9 милијарди евра повисоки. Централните банки со години купуваат долгорочни хартии од вредност, како државни и корпоративни обврзници, како дел од заедничката монетарна политика на еврозоната. Тие, пак, носат релативно ниски каматни приходи, за разлика од депозитите на деловните банки кои носат високи каматни расходи за централните банки.

„Ова создаде значителен ризик од каматна стапка“, нагласуваат од Бундесбанката. Австрискиот гувернер Роберт Холцман пред околу една година предупреди дека Европската централна банка (ЕЦБ) мора да престане да ги субвенционира комерцијалните банки со плаќање високи каматни стапки на депонираните пари што им ги позајмува по ниска цена.